Axır ki,qayıtdı övladın,Vətən!

Nigaran gözlərin hey yol çəkirdi
Axır ki,qayıtdı övladın,Vətən!
Üzə vurmasan da bu sonsuz dərdi,
Yandin,gizli-gizli ağladın,Vətən!

Aldın qucağına,basdın bağrına,
Qürurla boylandın dağlara sarı.
Yüngül məlhəm oldu sonsuz ağrına,
Qoynuna alanda qəhrəmanları.

Bir-birindən igid,ərən oğullar
Yolunda canını verməyə hazır.
Düşdüyün əzabı görən oğullar,
Qanıyla adını qayaya yazır.

Yolun haqq yoludur,canımız qurban,
Neylirik vətəni biz dilim-dilim!?
Gəlirik ,gözləsin hər elin,oban
İçəcək suyundan quruyan dilim.

Getdi oğulların,qayıtmaq üçün!
Qanı bahasına qorudu səni!
Yaralı könlünü ayıltmaq üçün,
Sonuncu baxışda aradı səni.

Əbədi,müqəddəs bayraq altında.
İsti qucağına döndü oğullar.
Tarix taleyinə zülmət qatanda,
Yolunda məşəl tək yandı oğullar.

İlham İdrisoğlu

Şəhid anası

Şəhid anası...

Titrək əllərinlə alıb şəklini
Ah çəkib ağlama,şəhid anası!
Dizlərin üstünə əyib belini
Sellər tək çağlama,şəhid anası!

Baxırsan gəldiyi cığıra,izə.
Quzu otardığı çəmənə,düzə.
Yaralı könlünü hey üzə-üzə,
Dünyanı dağlama,şəhid anası!

Ruhu ildrımda,şimşəklərdədir,
Qarabağdan əsən küləklərdədir,
Həsrətli,ümüdlü ürəklərdədir,
Çox matəm saxlama,şəhid anası!

Nə deyim,nə yazım,qələmim donur?
İlhamın dünyası odlanır,yanır.
Sənin dözümündən düşmənlər sınır,
Qara şal bağlama,səhid anası!

İlham İdrisoğlu 10.10.10 Brest

Şəhidlər

Şəhidlər

Dünən asta-asta dolandığınız

İzlər yad eyləyir sizi,Şəhidlər!

Yolunda can qoyub,qoruduğunuz

Düzlər yad eyləyir sizi,Şəhidlər!

***

Kür axır sükutla,Araz da dolğun

Kəpəzin,Şahdağın çöhrəsi solğun

Xəzrisi kəsilib,dağğalar durğun.

Xəzər yad eyləyir sızı,Şəhidlər!

***

Sukuta qərq olub Oğuz,Lənkəran,

Qəbələ,Qarabağ,Tovuz,Naxçıvan,

Bakıdan Gəncəyə yol üstdə Aran.

Ellər yad eyləyir sizi,Şəhidlər!

***

Analar ağlayır ananız kimi.

Atalar sizlayır atanız kimi.

Tezliklə qurumaz nisgili,qəmi

Gözlər yad eyləyir sizi,Şəhidlər.

***

Həsrətik Şuşaya,Cıdır düzünə

İsa bulağının qaynar gözünə

İpək örpəyını çəkib üzünə

Saz,tar yad eyləyir sizi,Şəhidlər!

***

Yalanmış bu dünya,bir şirin yalan.

Sinəsi gül-çiçək,urəyi talan.

Sevib-sevilməyə,min haqqı olan

Qızlar yad eyləyır sizi,Şəhidlər!

***

İlhamam,tıtrəyir əlimdə qələm!

Neyləsin odlara qalanan aləm!?

Ürək ağrısından yanıb,bükülən

Dizlər yad eyləyir sizi,Şəhidlər!

İlham İdrıs oğlu Brest 2000

Bu oğulu doğan ana xoşbəxtdir

Gülləsindən düşmən yandı,qovruldu,

Pis niyyəti öz başına sovruldu,

Gizləndiyi yuvayacan qovuldu,

Nə çəkindi,nə dayandı-yoruldu,

Bu oğulu doğan ana xoşbəxtdir!

Qanmazlarin haqqlı verdi dərsini,

Xatirlatdı Koroğlunun irsini,

Silkələdi,tutduqları kürsünü,

Bircə anda ağızları ovuldu,

Bu oğulu doğan ana xoşbəxtdir!

Gecə ova çıxanları ovladı,

Yol kəsənin yollarını bağladı,

Qaçdı yağı,sərçə kimi dağıldı,

Geniş dünya başlarına dar oldu,

Bu oğulu doğan ana xoşbəxtdir!

Vətən hissi alov saldı könlünə,

Neçə şirin kəlmə gəldi dilinə,

Geri baxdı-obasına,elinə,

Öz adını ləyaqətlə qorudu,

Bu oğulu doğan ana xoşbəxtdir!

Gözü güldü qatilləri əyəndə,

Daşdan-daşa özlərini döyəndə.

Qəfil güllə sinəsinə dəyəndə,

Vətəninin qayasına sarıldı,

Bu oğulu doğan ana xoşbəxtdir!

İlham İdrisoğlu Brest 20.07.2010