A dağlar!

A dağlar!

Dolmuş bulud kimi enib sinənə
Yerinə,yurduna yağım,a dağlar!
Son damla göz yaşım qurbandır sənə
Təki çaylağında axım,a dağlar!

Qısqanclıq edirsən niyə,bilmirəm
Yolları kəsmisən,gələ bilmirəm.
Axan göz yaşımı qəsdən silmirəm
Sulansın ,qoy Qarabağım,a dağlar!

Olsa ixtiyarım zalım dünyada
Gələrəm qoynuna payi-piyada.
Eybi yox,sönsəm də daşda,qayada
Günəşlə üstünə doğum,a dağlar!

Sənədir ümidim,qoru izləri,
Yaylağı,çeşməni,tənha düzləri.
Bir gün səsləyəcək şən bülbülləri
Almalı,heyvalı bağım,a dağlar!

Hərdən elə billəm lap yanımdasan
İlhamın canIndan axan qanısan.
Bizi güzləməyib yadlara qalsan
Yandırar dünyanı dağım,a dağlar!

İlham İdrisoğlu 11 mart 2010 Brest

◊ Dağlar

◊ Dağlar

Ulu Tanrı,rəhmin hanı
Çəkilibdir dara dağlar?
Necə yusun günahını
Yada səngər duran dağlar?
***
Damarında donub qani.
Babaların yurdu hanı?
Sinəsində lalə yanır
Başın çalıb qara dağlar.
***
Təslim düşüb,aciz qalıb
Bəd gözlərə tikan olub.
Zirvəsindən qanad çalıb
Qartal qiyyə vuran dağlar!
***
Dünya yaman hala düşüb
Zülmət qara yola düşüb
Könlüm yaman hala düşüb
Bu dərdimə çara, dağlar!
***
Kəkliklərin şən nəğməsi,
Qayaların qabal səsi
İlham üçün müqəddəsdir
Onlar gedib hara,dağlar?!

İlham İdrisoğlu 13.03.2010 Brest