Bəyaz qar üstünə qan yağacaqmış...

Bəyaz qar üstünə qan yağacaqmış...

Nə bilsin, onsuz da yuxusuz qalan

Ana son laylanı çalır bu gecə.

Arzuyla, diləklə, xoş xəyallarla

Körpə balasıyla qalır bu gecə.

Nə bilsin o körpə, ana qoynunda

Vətəndən vətənə pənah aparır.

Axrıncı aşrımın son addımında

Analı günləri bitir, qurtarır.

Nə bilsin o qoca, baba yurduna

Dünən ayaq basıb, çörək tapanlar

Qanlı əlcəyini geyib bir səhər

Adi insanlığı atar, tapdalar.

Nə bilsin ayazlı, ulduzlu gecə

Bəyaz qar üstünə qan yağacaqdır.

Dağların buzunu yuyub-əridən

Bahar yox, odlanan min bir ocaqdır.

Nə bilsin yuxuya gedən qayalar

Səhəri açacaq ah-nalələrlə.

Günahsız körpəni qoruduğuyçün

Tək-tənha qalacaq min güllələrlə.

Nə bilsin uzağı yaxın eyləyən

Aşrımlar, dolaylar, gizli cığırlar

Azadlıq,qurtuluş, həyat yolunda

Dönüb olacaqlar əbədi məzar.

İlham İdrisoğlu Brest, 24.02.2010